السلام عليكم
دي التدوينه حكمل فيها البارت التاني ( مشترياتي من ايهرب)
الي ماشاف بارت ون منتجات مجربه من ايهرب
راح اوريكم في اخر التدوينه الي طلبتو الحلوه الاء (الي فازت في ايهرب جيفت ) كانت تجربه حلوه ليا الحمدالله وشاركو اكتر من ٢٠٠ وحده
نبدا بطلباتي من ايهرب بعضها جربتها واخدتها للمره التانيه
برضو مافكرت اطلب ميك اب مكتفيه الحمدالله
الله يديم القناعه
الله يديم القناعه
في بعض المنتجات جربتها مره او مرتين ف راح اعطيكم الانطباع الاول
بعض الاشياء لصحباتي واخواتي واخواني ( صورتها لكم وفي بعضها جربتها )
نفس التدوينه الي فاتت حقسم المشتريات
- عنايه
-ومكملات غذائيه
مشتريات العنايه مرره تحمس زودتها شويه
الماسكات
-ماسك الطين ماجربتو كاتبين ينظف يزيل الاوساخ يخفي الخطوط الدقيقه
-ماسك العنب بيل اوف يعني اذا نشف ينشال عن الفيس ينظف يقفل المسامات ويوحد تون البشره
-ماسك النعناع ماجربتو التقييم عليه عالي جدا جدا والاغلب يمدح فيه كاتبين معالج ممتاز للاكني وحب الشباب ينظف ينعش تحسي باحساس حلو بعد استخدامو ..
-ماسك الطين الاوربي جربتو مرتين خلطت ملعقتين صغيره من بودره الطين مع ملعقه صغيره مويه ورد وملعقه مويه بارده مررره حسيتو يشد البشره كتجربه اولى عجبني واكيد حستمر عليه يصغر المسامات يشد البشره يخفي الخطوط الدقيقه مؤقتا ينظف البشره بعمق ويزيل الترسبات ( للبشره العاديه للدهنيه )
-ماسك الطين المغربي ماجربتو تقريبا نفس مفعول الطين الاوربي بس مخصص اكتر للبشره الحساسه حيفيدني اذا البشره صار فيها حساسيه من الجو او من اختراعاتي فيها لوول
السكربات
سكرب النعناع ينظف ينعش يعمل توازن ريحتو حلوه سكرب لطيف للوجه
سكرب الوجه متحمستلو مع انو ريحتو مو حلوه بس وقت تستعمليه ماتحسي بالريحه القويه يعني ممكن اتحملو .. كتجربه اولى مقشر ناعم لسا مااقدر احكم عليه كاتبين انو ٨٥٪ من الي استعملوه خلال شهرين لاحظو اختفاء التصبغات في بشرتهم طبعا شي يحمس بالذات لاثار حب الشباب المزعجه عن نفسي حبيتو كبدايه
سكرب الفوت ريحتو عجبتني توت مع نعناع خفيف وبما اني خلصت سكرب الفوت من بودي شوب بالنعناع حستمر على دا الين دحين حسيت سكربو ناعم انشالله يعطي نتيجه كاتبين يزيل الجلد الجاف وينعم وينعش
السيروم
من فتره ودي اطلبو وشايله هم يطلع مو تمام
على فكره مره اعشق السيروم وافضلو كترطيب للوجه عن الكريم العادي لانو نسبه الفايده تكون مركزه اكتر في السيروم فلو تبغي شي للوجه من مجموعه معينه لاتترددي خدي السيروم وغير انو اذا انحط البشره تمتصو بسرعه ومايبان واغلب الانواع ينفع تحطي ميك اب عليها بس عن نفسي احب استعملو في الليل
كاتبين انو خالي من ماده البارابين طبعا دي ماده كيميائيه حافظه تمنع الجراثيم وكده لكن تاثيرها خطر شويه عالبشره عالمدى البعيد تعمل حساسيه وممكن التهابات ولازم مانحطها قريب من منطقه العين ( للاسف كتير من شركات التجميل يحطوها في منتجاتهم )
نرجع للسيروم عليه مدح جامد انو يخفي الخطوط في منطقه العين في الجبين وحولين الشفايف انا الحمدالله ماعندي خطوط جامده بس للاسف ايام الدوام اذا مانمت كويس ومع الارهاق والشغل قدام اللاب مع الفونديشن يبان كم خط ف انشالله الاقي فايده منو ..
الشامبوهات
-شامبو الارغان يمدحوه للكيرلي الدراي هير انا شعري مو جاف ولا كيرلي بس مع الصبغات الاطراف تصير جافه واحتاج شامبو يكون ترطيبو زايد ريحتو حلوه جربتو مرتين يعطي فاليوم للشعر ودا اهم شي بالنسبالي مايهبط الشعر ولايزيتو
-شامبو للتنظيف العميق قرات الريفيوهات في الموقع وعجبتني تجاربهم ينظف الفروه ودي في شامبو قوي ينظف من قلب بالذات بعد مااحط الزيت على شعري كتت دايما استعمل بيج من لش للاسف خلص وكل مااروح فرعهم في مكه مول ماالاقيه وكنت حطلبو بس موقع لش ينرفز اشيائو تحير وغاليه وتاخد شحن كتير انشالله دا يفيدني
كوندشنر كاتبين في الريفيوهات يعطي فاليوم للشعر ويساعدك في تسريحو
استعملتو مرتين عجبني
pure&clear
جل وكريم لعلاج كل مشاكل البشره (اليمين)
الجل اختي طلبتو بعد ماجنتتها بيه كتبت عنو في حسابي الانستا بالتفصيل
كتبت عنو في حسابي الانستا بالتفصيلzinc cream
كريم لعلاج مشاكل البشره (اليسار)
اتحمستلو وتقييمو عالي مكتوب يعالج كل عيوب حب الشباب ، الطفح الجلدي، الاحمرار ، الحكه 
حسيت مابقي شي
حسيت مابقي شي
نوعو كريم طيني كبدايه حلو راح استعملو كمان وانزل بوست عنو في الانستا
زيت جوز الهند لصحباتي وحده طلبت الكبير ووحده الصغير
اتكلمت عنو في موضوع ايهرب منتجات مجربه
من طلبيات صحباتي
-زيت فيتامين اي لصحبتي انا استعملت الصغير كتبت عنو في التدوينه منتجات مجربه
-فرشاه تقشير الجسم والمساج يسار الصوره ذكرتني بفرشاه بودي شوب بس دي زياده عليها المساج
-الصابون الافريقي كتبت عنو قبل
حبوب الشعر ماكسي هير
شامبو مين ان تايل
دي طلبات اخويا بيستعملها من شهرين ودي تاني علبه من الماكسي هير بيستعملها وحتى الشامبو تاني مره يطلبو
راح انزل تجربتو في الانستا موثقه بالصور قبل & بعد
بارت تو المكملات الغذائيه
ماكترت بما انو عندي الشيا والكتان اهم شي ماخلصو
اخدت نوعين جديده جرانولا
النوع الاول هوا نفسو اول نوع طلبتو من ايهرب الشوفان المحمص محلى بالعسل
لزيز مره وكتبت عنو من قبل
النوع التاني جرانولا بالكوكونت
من لما طلبتها مني متخيله كيف حيكون طعمها
️️ بما اني دايما احط كوكونت مبشور عالجرانولا فمره اتحمست لدا عيبو سعراتو عاليه تقريبا نص كوب ب٢١٠ كالوري يعني لازم احسب كويس واستعمل كميه صغيره
️️ بما اني دايما احط كوكونت مبشور عالجرانولا فمره اتحمست لدا عيبو سعراتو عاليه تقريبا نص كوب ب٢١٠ كالوري يعني لازم احسب كويس واستعمل كميه صغيره
عاده في فطوري عالفواكه استعمل من ملعقتين ل٣ ملاعق كبيره جرانولا ماازود لاني احط معاها بذور شيا ف احس بالاكتفاء والحمدالله
تتذكرو النوع من الجرانولا الي كتبت عنو من قبل بالشوكلت والتوت المجفف حبيت فكرة التوت وطعمو وطلبت
نوعين راسبيري وكرانبيري
الكرانبيري حسيتو زي الزبيب اللين مو مجفف مره حلو وفيه حموضه بسيطه عجب ايلان
الراسبيري هوا نفسو الي عجبني في الجرانولا
مجفف من قلب ومحتفظ بشكلو ونكهتو ولونو ويتفتت بسرعه متحمسه اجربو
سكر الكوكونت لصحبتي مره يمدحوه صحي وممتاز للحلويات ماجربتو الصراحه
اخدت نوعين دقيق
الاول دقيق السبع حبوب للبان كيك والوافل والتاني دقيق الكوكونت
جربت النوع الاول عملت وافل طعم ماعليه شي بس ماهو مقرمش يعني ينفع للبان كيك اكتر وانا مني بانكيك بيرسون
حجرب دقيق الكوكونت ريحتو تجنن تذكرني بالبسبوسه
بذور اليقطين وكوكونت مبشور لاختي
شوفان نوعين لصحبتي
طلبيات الفايزه بمسابقه ايهرب جيفت
المسابقه كانت بعد العيد واستمرت ١٠ ايام وماشاءالله فازت الاء واتواصلت معاها وطلبت ٤ اشياء
زيت الارغان
شور جل الصابون الافريقي
سكرب الكاكو
زبده الشيا
جربت حاجتين منها زيت الارغان والصابون الافريقي وكتبت عنها في تدوينه منتجات مجربه
دي كانت مشترياتي قبل اسبوع ونص وصلتني،، الطلب من ايهرب عمري ماندمت عليه الحمدالله وكل مره اطلب اتحمس للطلبيه الي بعدها مو ادمان لاني بلاقي نتيجه حلوه من الاشيا الي بخلصها بالذات المكملات .. قريب حكتب تدوينه عن المكملات وايش اثرها في حياتي وكيف بستعملها …
- شي تاني ايهرب وفر عليا كتير اشيا كنت اشتريها من السوبر ماركت او الصيدليه يعني الشامبوهات ماصرت اخد غير من ايهرب ليا ولبنتي السكربات والماسكات افضل بكتير من الي كنت اخدها من الصيدليه وبودي شوب ….
انشالله تستفيدو 
شكرا
UmElan
سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ
ليست هناك تعليقات:
إرسال تعليق