صبغه لاكمي lakmee السحريه..

السلام عليكم 

..

كيف الحال

وقربت احلى ايام وبدات حالات التجديد والتنظيف ..

بما انو قرب العيد وحصبغ شعري قررت اني اكتب دي التدوينه عن صبغه لاكمي الي انتشرت من كم سنه وكتير يقولو انها سيئه وتعدم الشعر

…

هل فعلا تؤذي الشعر ؟

بالنسبالي كل الصبغات تعدم الشعر بغض النظر عن الشركه واغلبنا بيصبغ في صالون وبيحطولك اقوى درجه اوكسجين 

دي ماحتعدم الشعر الا طبعا دا غير لو عملولك سحب لون منجد تقري على شعرك الفاتحه 

،،،

كيف اخليها ماتعدم شعري؟

اول شي اعتني بشعرك والعنايه بالشعر لازم سواء صابغتو او لا 

حقلك كيف تعتني بشعرك …

تاني شي استعملي شامبو خاص 

اغلب الشامبوهات التجاريه الي بنشوفها في كل سوبر ماركت ماهي تمام وماتنفع ابدا للي صابغه شعرها

لازم اذا كنتي صابغه تستعملي شامبو خاص حسب درجه الصبغه

في التدوينه دي حتكلم عن تجربتي وكيف قد ماقدرت حافظت عاللون لاطول وقت وايش استعملت للعنايه واي شامبو

صبغه لاكمي lakmee

درجاتها كتير ولها كذا نوع دي اهم الدرجات الي تبان

والالوان الي تضيفيها للصبغه 

الازرق الكحلي تحت عاليمين

والاخضر والفضي فوق عاليمين

البنفسجي تاني صف عاليسار

اما بالنسبه للابيض ماغامرت واخدتو الي يفتح لون الشعر (لسحب اللون)

الي اخترتها دي

صورت بعضها 

اول مااشتريت الصبغه قبل تقريبا ٣ سنوات بحثت عن طريقه لاستخدامها وللاسف كانت لسا مااشتهرت ومالقيت ولا شي واضح اضطريت ارجع للي باعتني هيا الله يستر عليها وادتني الطريقه ومشيت عليها 

الطريقه :

تصبغي علبه اشقر مع علبه اوكسجين ولو شعرك طويل تدبلي انا كان شعري تقريبا معدي الكتف وكفتني بالراحه

بعد نص ساعه اول ماتشوفي اللون فتح تغسلي وترجعي تخلطي علبه اشقر مع ربع علبه ازرق واوكسجين كامل

وسويتها وانصدمت كل التفتيح من الاشقر الاول قلب سواد فاحم مزرق 

والفله انا كنت مسويه هايلايت ونازل بس باين في الخلف الهايلايت الاشقر البيج قلب ازرق تركواز

انفجعت وماعجبتني النتيجه بس اضطريت اقتنع بيها والحمدالله كان اسبوع اجازه لسا الدوام مابدا 

بعد ماخلص الاسبوع اتغيرت الصبغه وصارت زيتي وكل مره يعدي اسبوع كنت اكتشف لون جديد😀

بعدها بسنه قررت اطلب كذا لون ودورت على وكيل للصبغه يبيعلي هيا العلبه ب١٢ر بعد مااخدتها من تاجره ب٣٥ر

طلبت انا واخواتي كميات كبيره تكفي سنتين قدام 

انشالله ادور على حسابه واحطو في اكاونت الانستجرام 

احلى شي في الوكيل كل الالوان عنده

كل الانواع عنده

الاوكسجين جدا رخيص (اخدت الكبير )

مايتفلسف على راسك انو يعطيكي اللون دا او دا 

واحلى شي في خلال اسبوع توصلك من الرياض 

مره انصح بيه حتى كل من سالني عن الصبغه من فين اديهم رقمو يتعاملو معاه

طيب نجي للمهم 

بعد تجارب ٣ سنوات اقلك على طريقتي 

حقلك على طريقتين لاظهار اللون 

اول طريقه لو كنتي تبغي سحب لون او مسويه هايلايت حوريكي النتايج بالصور

تاني طريقه لو كانت صبغه كامل لكل الشعر بدون سحب برضو حوريكي بالصور ايش حيطلع

ملاحظه: الصور من تصويري وشعري وحاولت مااوضح كتير فااعتذر لو كانت شويه مغبشه انا قاصده دا الشي ..

الطريقه الاولى : بسحب اللون (هايلايت او اومبري)

حوريكي صور شعري لما كنت مسويه هايلايت قديم وجربت عليه من الصبغه 

فضي / ازرق / بنفسجي

الصوره الي عاليمين في النص جربت خصلتين بنفسجي وازرق وباقي الصورتين فضي 

ودي الصوره لما صبغت كل الشعر 

لما عملت اومبري 

طريقه الاومبري سهله جدا وتقدري تلاقيها في اليوتيوب 

حقلك عليها باختصار 

ظرف ويلا جل اقصى درجات التفتيح Blondor ( الي يستعملوه في تشقير الحواجب ) مع اوكسجين ٩٪

اخلطيه واقلبي شعرك قدام  ولميه واحد بس لاتشدي الربطه زي كده

دي اقرب صوره لقيتها لوحده اجنبيه (ممكن تغطي كل الشعر من تحت بصبغه التفتيح)

واصبغي من تحت بصبغه ويلا حقت التشقير 

انا خليتها ربع ساعه وغسلتها خفت شعري ينعدم ممكن تطولي نص ساعه حسب الدرجه الي تبيها

غسلي شعرك 

وممكن تاجلي الصبغه ليوم تاني عشان يرتاح شويه الشعر

اذا حتصبغي اختاري درجه تناسب الي انتي تبغيه

*يعني زيتي استعملي ازرق

 ( ازرق+ اشقر) النتيجه اخضر او زيتي

*رمادي استعملي فضي

*بلاتيني او بندقي استعملي بنفسجي

دي كلها جربتها وجربت الاخضر فاشل جدا ابدا ماانصح بيه يقلب اورنج معفن

الي استعملتو فضي 

خلطت علبتين اشقر مع نص علبه فضي مع علبتين اوكسجين وحطيتها على كامل شعري

طبعا الشعر مكان الفروه غامق مافيه سحب

السحب بس تحت في الطرف فحيبان اللون مختلف

وفعلا نص ساعه وغسلتو ودي النتيجه

وكل فتره كان يفتح اللون بس في الاخير طفشني لانو السحب مره يعدم الشعر تحسي الشعره ميته مافيها حياه بس كتجربه ومغامره حاجه مره حلو وودي اجربها تاني

تاني طريقه صبغ الشعر بالكامل 

نفس طريقه الصبغه دي المره كنت ابغاه زيتي 

خلطت علبتين اشقر مع نص علبه ازرق واتنين اوكسجين

وحطيتها على كامل شعري 

نص ساعه وغسلتها 

طبعا انا عارفه ايش النتيجه الي حتطلع عشان كده صبغت في ايام اجازه ماكان في دوام 

اول ماتغسليه يطلع دا اللون

لون اسود باهت كحلي جميل يديكي ثقه 

بعد ٣ ايام يصير كده 

بعد اسبوع 

اسبوعين او ٣ اسابيع

يجنن دا اللون

شهر

٣ شهور بدا الزيتي يروح وصار بني فاتح مطفي رمادي ( احوب اللون دا)

حيفضل اللون دا ( اذا اهتمينا بالشعر)

العنايه وغسل الشعر 

روتين اسبوعي اختاري واحد من الزيوت دي وحاولي تركزي عالفروه بس 

زيت جوز الهند

افوكادو

المشمش

جوجوبا( ممتاز مايغير لون الصبغه)

اورغان 

دي الي جربتها واعتمدتها كل اسبوع راح اعمل تدوينه انشالله قريب عنها

 كل الزيوت دي اخدتها من موقع ايهرب

غسيل الشعر

لما تغسلي الشعر بالذات لو صابغه من الصبغات دي تنتبهي من استعمال اي شامبو

بعدي عن بانتين لوريال نيفيا هيملايا صانسيلك 

استعملي شامبو خاص بالصبغه 

الي اعتمدتها 

*من ايهرب  شامبو ديزيرت اسنس بالكوكونت Desert Essence, Shampoo, Coconut

*من لش شامبو دادي اوو  ( البنفسجي )

*من لاكمي شامبو الشعر المصبوغ 

*من لش شامبو بيج للفروه 

*من لش شامبو كيرلي ويرلي 

راح اكتب بالتفصيل انشالله تدوينه خاصه بالعنايه بشعري دحين كتبتو باختصار لانو العنايه جزء مايتجزأ للشعر المصبوغ

دا كل شي اتمنى تستفيدو 

اذا عندكم اي سؤال اتفضلو هنا او في الانستا

وبما انو العيد بعد ٤ ايام كل عام وانتم بالف خير وسعاده 

شكرا ليكم

UmElan

Instagram

سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ