تجربه الشراء اونلاين من لش Lush رايي في 5 منتجات + Back to lush
بسم الله نبدآ
بقلكم حاجه بسيطه عني بدات عالم التدوين قبل ٥ سنوات كانت ليا مدونه وكنت اكتب فيها ستوريز بس بعد ماخلفت ايلانتي حذفتها وحذفت كل شي فيها كنت حرجعها بس قررت ابدا مدونه جديده دامها بدايه جديده ليا باذن الله
……….
نجي للشي الرئيسي الي هوا lush
قبل اكتر من سنه ماكان لش فرع مكه مول فتح لسا
وكنت متحمسه للمنتجات وودي اجربها
فقررت اني اطلب اونلاين بما انو السعر يفرق كتيييير عن سعر المحل ( قارنتها بمحل لش فرع ستارز افنيو جدة)
المهم حطيت اللسته وماخليت بلوقر او يوتيبر الا قريت وشفت الريفيوز عن اغلب المنتجات
جمعت انا واختي اللسته وقررت اطلب دايركت من الموقع البريطاني للسعوديه
دا رابط موقع لش البريطاني
الدفع كان عن طريق فيزا تسوق الراجحي وطلبو صندوق البريد
وتم الطلب
وبدا الانتظار..
اتاخرت الطلبيه واكتر شي يقهرني ويخليني اندم اذا طلبت شي وطلع بدون تراك نمبر الي هوا رقم تتبع الشحنه
اتاخرت الطلبيه وراسلتهم عالتويتر وحددولي تاريخ معين للوصول وفعلا وصلت بعدها على صندوق البريد بس اكتشفت :(
الطلبيه ناقصه يمكن ٤ او ٥ منتجات
رجعت راسلتهم قالو عشان نخفف قيمه الشحن عليا قامو قسموها مااستوعبت حركتهم دي المهم بعد شهر يمكن وصلني باقي المنتجات وللاسف كان في حاجتين ساحت :(
بعدها عرفت انو الدايركت ماينفع مع لش
جربت كم منتج واتخبلت عالاشياء والدلع والريحه
قررت اضرب الضربه الكبيره واطلب اشيا اكتر ليا ولاختي
بس حشحنها عن طريق شوب اند شيب ارامكس
وجمعنا الطلبات من كل شي
منتجات بشره على جسم على شعر
كلفتنا مع الشحن حوالي ٢٠٠٠ ريال
عارفه كتير <(
ووصلت الحمدالله
دي الصوره من حساب الانستا
من كل منتج اخدنا اتنين وبعض الاشياء غاليه توصل فوق ال١٠٠
وبدات عالم لش جاني اكتفاء منو بعدها بكم شهر فتح فرع مكه مول وكل مااروح اتفاجا بالاسعار الشاطحه
حاجه كلفتني ٥٠ يبيعوها ب١٣٠ يعني اكتر من نص السعر :/
قبل كم شهر بدات اخلص المنتجات وللاسف في منتجات خمجت واضطريت ارميها
دي اول ٥ منتجات خلصتها وحكتب ريفيو سريع لكل منتج واذا يستاهل او لا
اول منتج شامبو بيج الجميل بملح البحر (Big)
وصف المنتج من موقع لش السعوديه
حُضِّر هذا الابتكار المذهل من أملاح البحر التي استحوذت على أكثر من 50% من مكونات هذا المستحضر ويعمل على تنظيف الشعر ومنحه كثافة وحجمًا وتعطيره، كما يُضفي لمعانًا وترطيبًا على جميع أنواع الشعر. هذا الشامبو لا يصنع المعجزات بشعرك فحسب، بل يتميز برائحته الزكية الرائعة بفضل خلاصة زيوت النيرولي واليوسفي الممتازة. فلا حاجة لتتعطري بعطرك عندما تتألقين بشعر كثيف مغسول بشامبو BIG.
وفعلا صادقين !!
اول استعمال حتلاحظي حبيبات الملح كنو الملح الصخري ريحتو حلووه منعشه تعطر الشعر
بس مره ينشف لو استعملتيه بدون بلسم
طبعا طريقه استعمالو مره في الاسبوع لانو ينظف فروه الراس مره ماينفع للاستعمال اليومي
اكتر شي فادني لما اعمل روتين شعري وازيتو بعدها اغسل شعري ببيج يشيل كل الزيت ويخلي الشعر يصير نظيف
تاني منتج اوشن سالت (Ocean Salt)
وصف المنتج من موقع لش السعوديه
يستخدم في تنظيف بشرة الوجه والجسم كي يمنحها النعومة والنشاط ، ويعيد الحيوية للوجه المجهد. يحتوى على مزيج من ملح البحر و عصير الجريب فروت وزبد الافوكادو التى لها قدرة كبيرة على إنعاش البشرة. وضعناه لك في عبوات كبيرة حتى يمكنك استخدامه للجسم كله لا لبشرة الوجه فقط ، وستندهشي من التغيير المفاجئ ومدى فاعليته وتأثيره على بشرتك
اوك صح ينظف وسكرب كويس بس مو شي واووووو
عادي اقدر استغنى عنو مااداني نتيجه مرره
تالت منتج هيربلزم Herbalism
وصف المنتج من موقع لش السعوديه
ممن خلاصة الأعشاب بلونه الاخضر ينظف البشرة عجيني الملمس ويعود ذلك للطمي الطبيعي الموجود به، يحتوي على مجموعة كبيرة من الأعشاب المنشطه للبشره على شكل بودرة ، ممتزجة بالجليسرين ونخالة الأرز وزيت اللوز. إننا ننصح باستخدام Herbalism وخاصة للبشرة الملتهبة. لأحتوائه على أجود أنواع الأعشاب التي تتميز بكفاءتها وفاعليتها في تنظيف البشرة مثل زيت الزعتر البري وزيت نبات القراص وزيت الميرمية
اكتر منتج ابتلشت بيه :/
ريحتو اعشاب معفنه تحسيه خلطه من عند عطار :/
اوك كنت استعملو اذا طلعتلي حبه في وشي لاني احسو فريش شي طبيعي من ثروه الارض لوول
بس ابدا ريحتو ماتنطاق ومفعولو عادي مهدئ يمكن للبشره
والي تفكر تاخدو لازم تحفظو في التلاجه انا كنت حاطتو في الحمام وطلعتلو طبقه عفانه وشلتها وحطيتو في التلاجه مافي مفر الا بستعملو :)
وبرضو كمل تخميج وفي الاخر رميتو وغسلت العلبه
رابع منتج بلسم الشعر ريتريد Retread
وصف المنتج من موقع لش السعوديه
بلسم ثلاثي القوه لتنعيم الشَعر المتعب والمجهد.بمزيج رائع من الشّمام و الجوجوبا والزبادي ،لتغذي الشعروتعيد حيويته وبريقه.
يب مره حلو عن نفسي حبيييييت ريحتو الطبيعيه كنها ورق شجر
ومفعولو بلسم عادي ينعم بس مايعالج
وبرضو انصح ينحفظ في التلاجه لانو فتره وحسيت ريحتو قلبت خماجه بسيطه واستعملتو وحسيت بالريحه في شعري مو تمام وكويس كان باقيلو شويه ويخلص
اخر منتج
حبيبي كلنزر الوش
Let the Good Times Roll
وصف المنتج من عندي
يسموه عصيده الذره،، البوب كورن طاحنينو وحاطين معاه قرفه بس مو باين ريحتها عن نفسي حبيتو بوب كورن مع كاراميل
ينعم البشره ويعطي ترطيب مع انو بشرتي مختلطه مايله لدهنيه واغلب الريفيوز انو ينفع للبشره الجافه بس انا مره ناسبني
وكل ماقرب يخلص كنت افكر اخد الكبير منو بس اتردد خايفه يصيرلو زي منتجات لش الي عفنت
في المحل سعر الصغير اتوقع ٧٠ والكبير ١٠٠
اونلاين طلبت الصغير في حدود ٣٠ وشي
انصح بيه ماحتندمي
نجي لاخر بارت في التدوينه
Back to Lush
طبعا رجعت ال٥ منتجات الي خلصتها علب فاضيه وكنت احسب يعطوني ماسك بس ماعندهم يمكن عشنها لازم فريش وكده
وبدالو خيرتني بين نوعين كلنزر وطبعا دا اختياري
ومعاه لازم اطلع من المحل وانا دافعه فلوس :/ اخدت مسكره الرموش وروج درجتو مررره حلوه
انشالله حكتب ريفيو عن المسكرات واقلكم رايي في مسكره لش
وبس انشالله اكون افدتكم
شكرا ليكم ..
UmElan
سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ
سلام عليكم وين متوفرة بالمملكه وايش اسم الموقع اللي طلبتي منه المنتجات
ردحذف