بعض المنتجات الي ماحتندمي تاخديها من ذا بودي شوب
ايش ممكن تشتري من محلات بودي شوب الي ماشالله منتشره في كل مول
دايما ودي الاقي فيه شي يستاهل الشراء مدري ليه كنت مستبعده فكرة اني اشتري حاجه من المحل دا لدرجه كل مااعدي ماافكر ادخلو الين مابدات اقرا وابحث عن افضل شي يسووه
وفي مره دخلتو وكان عامل ديسكاونت واخدت اشيا بسيطه زبده شيا ومقشر الفوت وفرشاه الوجه الصغيره ومره ادمنت عالاشياء صرت كل مااروح الا مااطلع من عندهم بمنتج الين ماتقريبا جربت كل البترز واغلب السكربات وبدات في المنتجات الي اسمع عنها ويمدحو فيها
حكتب بالتفصيل عن بعض المنتجات الي ابدا ماحتندمي لو اخدتيها عن تجربه
١-زبدة الشيا
بريحتها الناعمه اللطيفه وتاثيرها عالجلد جدا رائعه انا استعملها لكل جسمي بعد الشور كنت ماخده الحجم العادي ٧٩ اظن ولما وفرو الحجم الكبير ٣٨٤ جم على طول اخدتها لانها اوفر ب٩٩ ريال وتقعد معاكي جربت كمان لوشن الشيا حلو بس خفيف مو زي الزبده احساس الترطيب والنعومه يطول وحلو للرجول بعد ماتستعملي الفوت السكرب تدهنيها بالبتر وتلبسي شراب
٢ سكرب الشيا
من افضل السكربات في بودي شوب جربيه قبل ماتغسلي جسمك بالمويه يشيل الجلد الميت ويديكي لون حلو وترطيب وريحتو كمان جميله تاني علبه استعملها وعلى قد ماجربت سكربات اشتاق لدا 
سعرو شي في ال٦٠ ر
٣ الفوت سكرب
جدا جميل وينظف الفوت من قلب الي عندي خلاص باقيلو نتفه ويخلص راح اخد واحد تاني انشالله الي دايما رجلها تنعدم من الشوز وتمشي كتير لازم يكون عندها دا السكرب
صح ريحتو نعناع وممكن بعض البنات مايعجبهم بس ايش افضل من النعناع للفوت يعقم وينظف وينعش سعرو حاجه في ال٣٠ او ٤٠ ر
٤ المرطب المبرد بفيتامين إي
شفتو احساس الارهاق والتعب بعد يوم حار طويل تستعمليه بعد ماتكوني حاطتو في التلاجه ، منجد يبرد كل اعصاب وعروق الوجه وكمان يرطبلك الوجه والرقبه ويديكي فينيش مطفي بدون لمعه مايبان انك حاطه شي وتحسي بنعومته جربت استعملو قبل الميك اب ممكن تحطيه وبعدو برايمر عالتي زون .. بطل سعرو ٧٩ ر
٥ الفيس ميست بفيتامين اي
مره نفعني ايام الدوام والتعب والكرف لما تجيكي حاله تكسلي تفتحي علبه كريم عشان ترطبي بشرة وجهك :( بالذات وقت النوم اريح شي ارش من الميست ، مرطب للوجه تحسي وجهك يلمع من الترطيب مفعولو يذكرني بالفكس بلس من ماك بس ماغامرت واستعملت بعدو ميك اب احيانا اخده معايا الدوام احط منه اذا حسيت الميك اب خلاص انتحر بس بعدو ماينفع تعدلي شي بالمويه زي مثلا الطبطبه عالفونديشن يقلب على بياض غبي يعني افضل خليه للترطيب والانتعاش ريحتو فيها ورد جميله سعرو ٤٧ ر
٦ كريم التبييض الحليبي
قبلو استعملت سيروم التبييض وعجبني وخلص ولما جيت باخده قالتلي الموظفه الكريم الحليبي نفس المفعول واخدتو وفعلا حسيتو افضل كمان صح مفعولو بطئ وبسيط بس مرطب ممتاز للوجه يديكي اشراقه حلوه لو استعملتيه بعد تنظيف عميق بسكرب او ماسك ولو كان اثر حب شباب ممكن يخففو او يشيلو سعرو ١٣٢ ر
٧ اخر منتج الماسك البطل قناع الطين الايوني باعشاب البحر
خليتو من ضمن روتيني الاسبوعي ممكن تستعمليه مرتين في الاسبوع بس احيانا ياللله افضى احط ماسك مره بس فعلا رائع وتلاحظي نتايجه كل مره تستعمليه ، عودت نفسي على حركه بسيطه عشان ماستصعب حطة الماسك كل اسبوع وقت اشقر حواجبي بنفسي احط ماسك في نفس الوقت على باقي وجهي يصير استغل الوقت كلها ١٠ دقايق او ربع ساعه والنتيجه ياسلام حواجب تمام وبشره نظيفه
طبعا مفعول الماسك للبشره الدهنيه والمختلطه بالذات الي تعاني من حب شباب ورؤوس سودا
ريحتو ريحة طين حلوه واول ماتحطيه ينشف بسرعه عالوجه سعرو ٦٩ ر
انشالله تعجبكم المنتجات لو جربتوها
شكرا ليكم
UmElan
Instagram
سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ
سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ
ليست هناك تعليقات:
إرسال تعليق