معاناه ست سنوات مع فستان عيد بنتي.. Eid dress for my girl

السلام عليكم 

كيف الحال جميعا

..

..

المفروض الموضوع دا ينزل في رمضان بس فضلت اني انتظر الين مااستفيد كمان من فستان العيد 

..

اكيد كل وحدة عندها بنت صغيره تقعد تحوس كل عيد ايش تلبس اول يوم 

من اول ماربي رزقني بايلانتي ربي يحميها وانا كل سنه اتهجول في المولات ادور حاجتين لون حلو وفستان منفوش

..

اذا انتي من الامهات الانيقات ببناتهم الي يهمها بنتها ايش تلبس وتفكر فيها قبل ماتفكر في نفسها دا الموضوع حيساعدك 

اما لو كنتي من الي عادي اهم شي فستان ولبس والسلام لاتتعبي نفسك وتكملي 

..

يمكن الهرجه تكون لاني ماستمتعت بطفولتي بما اني كنت البنت الرابعه والاخيره قيدها مامتي شبعت من التلبيس في البنات فحبيت اعوض الاهتمام بنفسي واخليه لبنتي والحمدلله كل مره الاقيها مبسوطه وحابه كل فستان فصلتو لها واللون نختارو سوا واحاول افهمها الموديل وتساعدني تقلي با ايش ودها ومستحيل اسوي فستان بذوقي والبسها غصبا عنها لازم يعجبها هيا اول ..

.

.

(( يحتاج موديل في بالك- لون تختاريه -قماش تشتريه -وخياط تقدري تفهميه))

..

..

..

..

راح اوريكم بالصور وحاولت ابهتها وماابين شي معليش القصد تعرفو الفكره الي بوصلها للموديل والاختيار مو نشر صور بنتي (لا اسمح باخد الصور حتى لو مواضح )

..

..

 البدايه كانت من اول سنه لقيت فستان مشي الحال لونو حلو لكن للاسف لامنفوش ولا جمبها

بس عشنها صعنونه كان عمرها ٩ شهور طلع يزنن عليها ربي يحميها

..

..

للاسف مولاتنا مافيها محلات تبيع فساتين تستاهل وتلاته ارباع المحلات ماعندهم غير ياابيض ياسكري 

ليش مااعرف انا اكتر لونين مااطيقهم دي يعني لو مره الطفله لبست دا اللون بس مو حلا كل سنه وغير انها ماتعيش لطخه روج او حلاوه او اي شي وينعدم وغير اسعارهم اذا فستان تمام ٣٠٠ وفوق وعاده اخد ٤٠٠ (ليش ادفع مبلغ في حاجه مني راضيه عليها)

..

..

المهم نجي لتاني سنه برضو دورت واخر شي مالقيت غير محل مونسون الي كل الشعب يشتري منو اضطريت اخد وللاسف لا لون حلو ولاحتى منفوش عليها حاولت اركبلو جيبون (حلمي اشوفها في فستان زي الاميرات ) الي حلاه برضو عمرها لسا ماكملت سنتين كان سنه وكم شهر وطلع شكلها كيوت ماشاءالله

بعد ٤ سنين مازال دا الفستان مناضل في اسواقنا :(

..

..

..

..

..

السنه الي بعدها قررت اني افصل وكان في بالي فستان الفلورز الي كلو ورود من فوق 

لما بحثت لقيت كتير مصممات موجودين على موقع اتزي يبيعو دي النوعيه وكان جدا دارج قبل ٣ سنين

دا رابط الموقع لو بحثتي عن flowers dress for girl حتطلعلك اشياء كتير 

..

راسلت وحده مصممه واخترت اللون وكل شي كان خاطري في لون بنكي غامق

بعد ماحسبت الفستان والشحن ممكن يوصل ٧٠٠ او ٨٠٠ ر

ماعندي مشكله ادفع في حاجه انا ابغاها لكن المشكله خفت يكون شي مو تمام نوعيه القماش او نوعيه الورد او المقاس

..

اخر شي جا في بالي اني اخيط وكان الوقت اخر شعبان استغليت ونزلت بسرعه بشيك عالاقمشه والورود واخدت اقمشه تل اكتر من درجه ولما شفت الورد استغفر الله فااااااااشل الي من لما اتولدنا ماغيروه قالولي كتير في البلد تلاقي بس ايش يوديني داك الوقت وماعندي فرصه اصلا يااخد ادبر نفسي يااشتري فستان جاهز

..

وصدفه عديت من مكان يبيع ورد واتخيلتو على فستان حيجي يجنن واخدتو ولا قلت لاحد عن المكان  حوريكم الفستان بعدين حقلكم الورد من فين :)

تخيلو الورد دا صناعي طبعا ……….. من هوم سنتر !

لما قعدت اركز في فساتين المصممات على موقع اتزي حسيت الورد زي الي نشوفو في المحلات وصور الديكور بس الفكره انك تقتنعي انو لايق وتنسقي الدرجات مع القماش

على فكره دا الفستان من اجمل الفساتين الي صممتها والين دحين يجي على ايلان صح شويه قصير مو نفس اول مالبستو بس جميل جدا ومازال كل مااحد شافو يسالني من فين احيانا اقلهم تفصيل واحيانا اقلهم من برا حفظا للحقوق وكده 

..

السنه الرابعه سنه فروزن وايلسا 

اول شي اختار اللون طبعا ازرق، التصميم برضو نسقت كذا فستان والفكره كانت اني ابغا اخترع موديل مقتبس من موديل ايلسا بس مايكون نفسو بالزبط

وكانت دي النتيجه

الفستان عملناه انا واختي لبناتنا 

.

.

السنه الي بعدها مخي قفل ماعرفت ايش اسوي وكل مااسال ايلان ايش تبي لون تقلي ازرق:(

لسا معشعش في مخها فستان ايلسا 

اخر شي رسيت على احمر وطوق ورد والقماش تل وترتر 

ومع انو بسيط والموديل ماكان مرره باين بس طلع انيق لكن مااعتبرو من افضل الفساتين الي لبستها 

.

.

.

وقررت السنه الي بعدها اني اعملها طوق ورد وحزام وارتاح من هجوله الموديل 

.

.

 من شهر ربيع تاني قلت الحق قبل زحمه رمضان راسلت حساب عالانستا قد طلبت منها اطواق ورد وجدا وردها مميز وجميل لما طلبت منها تعملي طوق وحزام واسوره وفيونكات للشوز  ومع انو ايلان كانت ناشبتلي اسويلها فستان رابونزيل بس ماكنت مقتنعه اولا فستانها مافيه داك الموديل وغير كده قديمه رابونزيل اقنعتها نختار نفس اللون ورضيت

لما راسلت حساب الورد لقيتها مررره رفعت اسعارها ولما حسبت حطلع من عندها قريب ٥٠٠ ودا كلو لسا باقي الفستان ماخيطتو يعني لسا حشتري قماش ولسا حدفع للخياط:(

.

قعدت فتره استخير وافكر وصدفه لقيت اعلان لفيلم كرتون الاميره صوفي 

وفستانها لونو نفس رابونزيل والموديل قريب شويه

قعدت ابحث وايلان لانها كبرت ربي يحميها ومختمه افلام اميرات ديزني كانت كل يومين تنطلي بفستان اميره مره اورورا الي فستانها بنكي ومره بيل الي فستانها اصفر واخر شي ناطتلي الا تبا زي اريل الميرميد !

.

.

.

اخر شي بحثت عن كم فستان منهم صوفيا وبيل ومن حسابات مصممات اجانب عالانستا عجبني موديلها 

وحاولت ادمج ال٣ افكار في فستان راح اوريكم الصور الي عاده اطبعها للخياط 

طبعا الخياط الي انا اتعامل معاه مايشوف وشي الا وقت فستان العيد مااحب اخيط عاده .. ومن لما يشوفني احسو يتنهد يووو ايش الهم دا ومايدري اني اشيل هم اروح عندو غثا مايفهم وكلامو مكسر ومخو تقيل مايستوعب بس شغلو شاطر ويتقن الخياطه ولما يفهم يزبطلي الفستان زي ماابغاه وحتى لو في تفاصيل نسيت اقلو عليها الاقيه سواها زي مااباغاها

..

..

..

الحمدلله طلع من افخم واحلى الفساتين الي عملتها جدا جميل تبارك الرحمن في اللبس والمشيه وكل شي

التفاصيل البسيطه الي تفخم الفستان زي التاج والشنطه سبحان الله صدفه لقيت شنطه صوفيا ومره كانت لايقه

،،

،،

دايما لما يكون الشي بنيه حلوه ولطفلك ربي ييسر الامور حتى في ابسط الاشيا لانو الهدف مو عشان الناس يقولو واو امها تلبسها تمام في الاخير محد حيطل فيا خاصه انو بعض الناس الي مايعرفنا يحسبوها بنت امي :( ياخساره التعب لكن الهدف والي يهمني اني اشوفها فرحانه ومبسوطه وتحس بمتعه الطفوله الي هيا فيها وتحس باحساس العيد وتعيش حلم انو كل طفله ودها تكون اميره حتى لو بفستان ..

..

..

..

..

..

في الاخير دول امانتنا في الدنيا خلوهم في افضل حال لو عندك بنت او ولد اساليهم ايش ودكم تكونو خلوهم يحلمو خليهم يعرفو كيف يلبسو عيشوهم في احلامهم الطفوليه …الحمدلله ربي مارزقني غيرها واحمد ربي كل يوم انو اعطاني هيا 

يارب ارزق كل انسان باللي يتمناه..

..

..

..

..

 اتمنى تستفيدو ياامهات من الموضوع دا ويفيدكم قبل كل عيد واتذكرو حاجه تسوها بطيب خاطر لو تتعب شويه احسن من لفلفه مولات واخر شي مشي حالنا .. وكل عيد وانتو وبناتكم وعيالكم في افضل حال..

..

..

شكرا ليكم

UmElan

Instagram

سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ

صبغه لاكمي lakme part 2 + صبغه indola من نزيه

السلام عليكم

كيف الحال جميعا ً،،،، زمان مررره عن التدوين انقطعت فتره طويله جدا

……

بعد سنه من كتابه التدوينه الاولى للصبغه اخيرا فضيت اكتب بارت تو 

من فتره طويله ودي اكتب التدوينه دي وجهزت الصور والافكار بس الوقت غلبني وابدا مافضيت 

الي ماقرا التدوينه الاولى يشوفها هنا

.

.

.

السبب التاني الي خلاني افكر اكتب التدوينه دي كميه الاسئله والاستفسارات الي تجيني عالتدوينه وعلى حسابي الانستا عالخاص وفي الكومنتس 

وقد ماقدرت كنت احاول اجاوب اول باول لكن مرت ايام كنت مااقدر ارد على احد ومعليش سامحوني عالتاخير وفي ناس تسآل والاجوبه قدامها في التدوينه يعني كيف اعيدلك نفس الكلام ولاانسخلك من التدوينه 🙄🤔

.

.

في التدوينه دي راح اذكرلكم عدة نقاط ومنها كمان حعيد خطوات بطريقه مرتبه ذكرتها في تدوينتي الاولى 

.

.

*اول شي راح اتكلم عن طريقه الصبغه العاديه والالوان الي ممكن تضيفيها 

*تاني شي سحب اللون الجزئي للشعر الاومبري 

*تالت شي سحب اللون الكلي للشعر البليتش 

*رابعا اعاده احياء اللون بعد فتره من الصبغه الرنساج

*خامسا الاهتمام والعنايه بالشعر 

.

.

.

اولا 

صبغه الشعر العاديه 

اللون الموحد 

في عوامل كتير مهمه لازم تعرفيها 

لون شعرك الاساسي الاندرتون لو 

متا صبغتي اخر مره شعرك عاده يبان فيه اللون 

اذا محنيه شعرك ؟

اذا كان شعرك طبيعي قابل للصبغه فمعناتو النتيجه حتكون زي صور التدوينه الي قبل  او قريبه

اما لو كان لا فلازم ضروري جدا تعملي اختبار 

تاخدي خصله وتجربي 

حتى لو حتسحبي لون لازم تجربي اول في خصله وتشوفي مدى قابلية شعرك للصبغه واللون ايش حيطلع 

..

حطي ببالك اللون الي تشوفيه في الكتالوج ماحيطلع نفسو ابدا حيطلع اغمق لانك مو ساحبه لون 

لما تسحبي كمان حسب درجه السحب حيطلعلك اللون 

يعني مو بالسهل تحطي لون في بالك وتبي الا هوا نفسو يطلع 

ترى كتير صوالين تقوليلهم لون ويطلع لون تاني بعيد عن الي تبيه لانهم سحبو لدرجه مو تمام 

دا غير الي يخبصولك كم لون وفي النهايه تجيكي وحده تقلك شو هيدا بيعئد اللون بيجنن عليكي احلى من الي اخترتيه نتيجه فزيعه

ترا لازم تعرفي انها بتسلك لنفسها قبل ماتسلكلك

.

.

لاتضمني اي احد تمسكيه شعرك 

تبي نتيجه واو روحي مكان مضمون وعند وحده ضامنتها 

.

.

طبعا دا الكلام انا بقولو عشان تكوني مقتنعه انو حتى بعض المحترفين الي بالاسم بس مايعرفو للصبغات فما بالك صبغه البيت الي بنفسك تسويها 

.

.

وعن نفسي اصبغ بنفسي واقتنع بالنتيجه ولا اروح لوحده ادفع مبلغ وقدره واخرتها لالون عدل ولا فلوس

..

المهم 

نجي للصبغه 

*

العاديه 

حسب طول شعرك 

انا استعملت ومازلت استعمل لاكمي 

صارت متوفره في كتير محلات 

حكتب فين متوفره في مكه في بوست عالانستا انشاءالله ( تلاقو حسابي اخر الموضوع)

الطريقه: بدون سحب 

لكل علبه لون اشقر تستعملي ربع علبه ازرق او فضي او بنفسجي حسب الدرجه الي تبيها 

الاشقر درجاتهم قريبه من بعض واتكلمت عنها من قبل فماحرجع اعيد الكلام 

عموما لو اخترتي اي درجه حتديكي نفس النتيجه تقريبا 

اهم شي اللون الي حتضيفيه للاشقر 

ازرق= حيديكي لون بني غامق مايل لاسود مزرق كحلي اذا فتح بعد اسبوعين حيصير زيتي

فضي= بني رمادي صريح حيفتح بعد اسبوعين لكن يحتفظ بدرجه الاندرتون الرمادي الباهت

بنفسجي= يعطيكي بني بندقي اذا فتح للاسف يقلب على بني محمر شويه

..

دي الصوره مثال عن خلط الاشقر مع اللون المناسب 

دي الصبغات واللون المناسب لها حسب تجربتي ممكن تغيري لكن مااعرف ايش النتيجه

….

….

مثال:  (قيسي حسب المثال المذكور لطول الشعر اذا اطول زودي واذا اقصر اقل)

اذا شعرك معدي الكتف 

علبتين اشقر + نص علبه ازرق + علبتين اكسجين  (الاكسجين انتبي للرقم في بعضها خاصه للتفتيح وبعضها لا)

تخلطيهم سوا مع بعض وتحطيها على شعرك 

ممكن تخففي الازرق وتحطي اقل من نص لكن لاتزودي حيقلب لون الشعر اسود فاحم بعدين 

.

.

.

يسار الاكسجين يديكي اقصى درجات التفتيح واليمين اخف منو ممكن تستعمليه للصبغات المتوسطه المايله للفاتحه اللون زي البني الفاتح وكده

..

..

طريقة الاومبري او سحب اللون (البليتش)

سحب اللون لكامل الشعر ماقد سويتو فمااعرف ايش حيصير وايش النتيجه 

حتكلم عن الاومبري لاني سويتو 

شرحت طريقه الاومبري في التدوينه الي قبل هنا وبالصور كمان

 السحب استعملت ظرف ويلا الي نشقر بيه الحواجب في صبغات سحب وممكن تشتري الاولابلكس ( مادة تحمي الشعر من انو ينحرق وتقدري تفتحي الشعر على مراحل وتحافظي عليه اذا استعملتي الاولابلكس )

رابط الاولابلكس في موقع امازون olaplex

موقع الاولابلكس مكتوب  في السعوديه متوفره في محلات نزيه عاد مدري تلاقوها او لا اتوقع دايما مخلصه وللاسف موقعهم مايبيع الا للصوالين😑 انا ماجربت الاولابلكس ولااعرفلها وودي اطلبها واسحب والعب بشعري واحط كل الالوان انشاءالله اقدر احقق الشي دا:)

.

.

نكمل

اسحبي خصله عشان تتاكدي وابدا لاتسحبي وتخليه اكتر من ساعه ولايوم انتبي شعرك دا انا مااخليه اكتر من ربع ساعه ومستحيل توصلي لدرجه البياض ابدا لاتحلمي ممكن شعرك يتمط اذا لقيتي لمعه في شعرك حطي ببالك انو انحرق

ترا حتى الصبغه اذا زادت عن ساعه ولقيتي الشعرات تلمع وملمسها قاسي معناتو شعرك ولع

.

.

بعد ماتسحبي خلي شعرك يرتاح كم يوم 

ممكن بعد اسبوع ترجعي تسحبي تاني

وممكن تجربي على خصله اذا عجبك اللون خلاص لاتسحبي مره تانيه 

اصبغي بس حاولي الصبغه بعد كم يوم من السحب عشان الشعره ترتاح

.

.

بالنسبه للشعر كامل زي ماقلت ماقد جربت ولاسويتها لابنفسي ولافي صالون 

كنت مره حتجنن واسويها بعد ماولدت بنتي ورحت صالون جاك ديزاين دينساج جدة  وكنت مقتنعه ومستعده للسحب الحمدلله الي مسكتني مارضيت وصبغت هايلايت ولولايت 

.

.

في حل للي تبغا تسحب شعرها كامل

ممكن تروحي صالون يسحبولك 

وحاولي انك تدورلي صالون يستعملو الاولابلكس

او

انك تطلبي الاولابلكس او تشتريه وتسحبي بنفسك غير كده ابدا لاتلعبي بشعرك

.

.

في واحد في الانستا دلتني عليه صحبتي فنان صبغات 

مايسحب الا بالاولابلكس وعليه اختراعات️

شوفو صور من بعض صبغاتو 

بالله مو تبكي صبغاتو:(

.

.

طيب نجي للرنساج

اي صبغه تصبغيها بغض النظر عن نوعها وفين عملتيها حتعدي عليها فتره وتبهت او تفتح او تقلب اورنج

اذا وصلتي لدي المرحله وغالبا بالاهتمام تقعدي ٣ او ٤ شهور الين تقلب ممكن هنا تعملي الرنساج

طريقة الرنساج:

مقدار ملعقتين صبغه ملونه ازرق او فضي او بنفسجي حسب صبغتك الاساسيه + ملعقتين اوكسجين + ملعقتين او٣ ملاعق بلسم شعر 

تخلطيها كلها وتبللي شعرك وتحطيها على شعرك تخليها بين ١٠ دقايق لربع ساعه وتغسلي شعرك بدون شامبو ممكن تستعملي بلسم بس

.

.

في حاجه مهمه 

خلط الصبغات من كذا شركه 

سويتها مره قبل فتره 

اخدت صبغه من نزيه على كلامو انها تمام وفيها الوان تهبل

من شركه indola

وخلطت معاها فضي من لاكمي مع فضي واللون الاساسي الاشقر من الشركة دي مع اوكسجين لاكمي مع اسود كحلي من كوليستون ( ابغا صبغه باهته غامقه)

اول مااغسلت شعري الاقي خصله قد ايش كبرها في يدي

وبعدها خصله وبعدها خصله 

الين صرت اصيح 

في البدايه حسبت من الصبغه حقت نزيه بعدين قعدت ابحث عن الصبغه لقيتها كويسه نوعا ما ومحد اشتكى ونتيجتها قويه 

بعدين استوعبت عشان خلطت كم نوع وقعدت شهور اعالج في شعري وانتبه لاكلي واخد فيتامينات والحمدلله دحين الوضع مستقر

.

.

الاهتمام والعنايه بالشعر المصبوغ:

بالنسبه للاهتمام والعنايه سبق واتكلمت في التدوينه الي قبل

لكن حلخصلك كم حاجه جربتها وفادتني

الشامبو زي ماكتبت استعملي شامبو خاص بالشعر الرمادي الي لونو بنفسجي 

في الصوره من شركة لاكمي ولش في شركات تانيه ومتوفر في نزيه كمان بس دايما مخلص 

استعمالو مرتين في الاسبوع او مره 

.

.

الزيوت انتبي لاتستعملي اي زيت

انا اكتر زيت حسيتو مايقلب اللون الجوجوبا 

ونادرا مااستعمل غيرو اذا راحت الصبغه او بهتت استغل دا الشي واحط زيت على كيفي لكن اذا الصبغه جديده او عاملة رينساج احرص اني مااحط اي نوع 

.

.

مقتطفات

ما شاء الله

صوره لشعري قبل سنه كنت طفشانه وقعدت اخترع الصبغه بدون سحب بس كان لون شعري الاساسي الصبغه فاتحه فمسكت فيها الصبغات الملونه

.

.

الفيتامينات الي استعملتها فتره ماطاح شعري 

انشاء الله اكتب بالتفصيل عنها في حسابي الانستا

.

.

الزيت الي حاليا استعملو قبل لااصبغ شعري للعيد🌚

باذن الله لو صبغت قريب راح احاول اصور تجربتي لاني حستعمل صبغه جديده معروفه بس ماقد جربتها 

.

.

وفي النهايه سامحوني عالتاخير 

واي وحده تسالني رجاءا ربي يسعدك اقراي كويس التدوينه دي والي قبلها اذا مالقيتي اجابتك اسالي لكن شي موجود قدامك وتسالي حضطر اقلك ارجعي للمدونه

والي تسالني ايش رايك احط الصبغه دي مع دي عشان ابغا النتيجه دي وترسليلي صوره شعرك :( !!!!!!! شعرك جربي طيب غير الالوان والصبغه الي مكتوبه في المدونه والله مااقدر اخترع وابكش واديكي شي من راسي 

…

..

..

دا كل شي اتمنى تستفيدو 

اذا عندكم اي سؤال اكتبولي في الكومنتس تحت

وبما انو العيد قرب كل عام وانتم بالف خير وسعاده 

شكرا ليكم

UmElan

Instagram

سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ